Një vit pas zjarrit që shkaktoi dëme të mëdha në kishën e Shën Ilias në fshatin Lekël të Tepelenës, objekti i kultit është pranë përfundimit të punimeve restauruese.
Zjarri, i favorizuar nga erërat e forta, përfshiu çatinë dhe tavanin e kishës, ndërsa pjesa tjetër e ndërtesës u shpëtua falë ndërhyrjes së banorëve dhe forcave zjarrfikëse. Aktualisht, restaurimi po kryhet me mbështetjen e Ministrisë së Kulturës, ndërsa paralelisht po punohet edhe për përforcimin e strukturës së objektit.
Kisha e Shën Ilias është ndërtuar në fund të shekullit XVIII dhe fillim të shekullit XIX dhe përbën një nga objektet e rëndësishme të trashëgimisë kulturore në zonën e Tepelenës.
Pas dëmtimeve të shkaktuara nga zjarri i 12 gushtit të vitit të kaluar, ndërhyrja restauruese ka synuar rikthimin e elementeve të dëmtuara dhe ruajtjen e vlerave historike e arkitekturore të kishës.
Me përfundimin e punimeve, Shën Ilia pritet të rikthehet në identitetin e saj, duke ruajtur rëndësinë si pjesë e trashëgimisë kulturore dhe historike të Leklit dhe të gjithë zonës së Tepelenës.