Perlë e trashëgimisë Shkodrane, banesa e Halilit drejt rijetësimit

Banesat shkodrane njihen për vlerat arkitekturore, kulturore dhe historike që ato bartin. Gjithnjë e më shumë këto banesa janë në vëmendjen e institucioneve përkatëse për t’i mirëmbajtur, në mënyrë që të ruajnë këto vlera dhe të jenë atraksione të denja turistike.

Specialistët e DRKK Shkodër, gjatë këtyre ditëve kanë nisur punimet për restaurimin e banesës së Ismet Halilit, pjesë e kolanës së perlave të trashëgimisë së qytetit të Shkodrës.
Kjo banesë është shpallur monument kulture, e kategorisë së parë në vitin 1973. Është një banesë e variantit dy katësh prej druri dhe i përket variantit me çardak. Qendra e kompozimit është çardaku, me të cilin ndërlidhen të gjitha mjediset e katit, ku më i vlerësuari është ai i “odës së miqve” dhe qoshku.

Ajo vlerësohet për realizime të arritura në drejtim të trajtimit të brendshëm arkitektonik – dekorativ, ruan tre mjedise karakteristike me ornamente tradicionale që përfaqëson më së miri tipologjinë e banesave të fund shekullit VXIII-XIX. Këto banesa janë në vëmendjen e institucioneve përkatëse për t’i mirëmbajtur ato që të ruajnë këto vlera dhe të jenë atraksione të denja turistike.