“Pranverë e paharruar në fshatin e harruar”, regjisori Kushtrim Bekteshi prezanton filmin e ri

I ftuar në emision Chik është sot një regjisor i njohur i cili sapo ka nxjerrë filmin e tij të parë artistik ‘Pranverë e paharruar në fshatin e harruar’. Bëhet fjalë për një komedi brilante që vjen nga regjisor Kushtrim Bekteshi, një personazh që vjen nga Shkupi, por që është shumë i njohur në botën e teatrit.
Pikërisht ky projekt e solli Kushtrimin në vëmendje të publikut shqiptar në Tirana Film Festival. Filmi zhvillohet në një fshat ku karaktere të ndryshme përballen me një fenomen, i lashtë sa gjithë bota sa gjithë njerëzimi. Filmi që zhvillohet në një fshat, ku gjithçka duket se ka stopuar, sjell tronditje të madhe shpirtërore por edhe kulturore.

-Si lindi ideja e këtij filmi, ku u bazove për të bërë këtë film?

-Ato janë thjesht kujtime të fëmijërisë time, edhe pse aty nuk ka asgjë personale. Unë kam jetuar në një fshat ku flitej për të hapur një kafe të tillë dhe ku do të sillnin aty këngëtare. Kështu vendosa me këtë temë të bëj filmin, në fillim mendova ta realizoja me metrazh të shkurtër, por miqtë e mi më thanë që ta zhvilloj në një film me metrazh të gjatë.

Filmi ka zgjatur shumë. Më janë dashur plot tre vite për ta shkruar dhe mbështetja që më dha producenti më dhanë mundësinë të realizoj filmin tim të parë. Ka qenë një sfidë e madhe, pasi unë jam një regjisor teatri dhe kjo ishte një risi për mua. Ka qenë një frikë e madhe gjithashtu, edhe pse kisha bërë dy filma me metrazh të shkurtër më parë, realizimi i një filmi të këtyre përmasave ishte një gjë e re për mua, megjithatë them se ja kam dalë.

-Ky është një bashkëpunim Kosove-Maqedoni-Shqipëri, por xhirimet e filmit janë bërë në Shqipëri, pikërisht në Korcë. Pse mendove që aty koha kishte ndaluar?

-Kjo është një meritë e skenografik Durim Neziri, i cili pasi lexoi skenarin me tha që duhet të gjejmë një fshat të përshtatshëm, sepse e gjithë ngjarja zhvillohej vetëm në fshat dhe fshati Gjenomadh ishte ai i duhuri. E them me bindje se pa këtë fshat ky film do të ishte 50% më i dobët dhe pa këtë fshat nuk do kishte këtë atmosferë që ka. Në film marrin pjesë aktorë të njohur. Interpretojnë në të Ndriçim Xhepa, Romir Zalla, Taulanta Jupi, Ervin Bejleri etj. Janë rreth 60 aktorë të angazhuar në këtë film dhe mbi 300 figurant.

-Po si ja dole për të bërë kaq shumë karaktere dhe asnjë kryesor, mbi të cilin 90% e filmave krijohen?

-Kam pasur shumë producentë të jashtëm që më kanë thënë që duhet të kisha një personazh kryesor, por qëllimi im nuk ishte të bëja një film me personazh kryesor, me interesonte impakti që do të kishte një kafene me prostituta.

-Edhe pse ti e konsideron një film komedi, aty ka ngjarje tronditëse që nxjerrin në pah situatat psiko-sociale të një vendi, pavarësisht se merr një fshat, aty shfaqet një fenomen mbarë shqiptar, apo mbarë ballkanik. Pavarësisht të veçantave që ne treguam për filmin, i ngelet publikut të nxjerrë vlerësimet e tij.

/BalkanWeb