Arinjtë polarë po jetojnë pranë zonave të banuara

Ndryshimet klimatike dhe shkrirja e akujve ka bërë që arinjtë polarë të nisin të përshtaten në territore të ngrohta dhe pranë zonave të banuara. Agjencitë e monitorimit konstatojnë një rritje të numrit të tyre, madje ka mjaft denoncime kur arinjtë kanë vrarë njerëz në Kanada.

Ndryshimet klimatike kanë një impakt të fortë në jetën e egër përreth globit. Ngrohja globale po ndryshon kohën e cikleve të jetës, duke bërë që speciet të zhvendosen dhe në disa raste edhe të zhduken.

Sipas studimeve të World Wildlife, numri i arinjve polarë në  jug të detit Beaufort ra me 40 për qind gjatë viteve 2001-2010, nga 1500 në 900.

Ekpertët shprehen se Kjo rënie dramatike në verilindje të Alaskës dhe Kanadasë, lidhet me shkrirjen e akujve në det.  Ata shpenzojnë mbi 50% të kohës së tyre mbi akuj, duke gjuajtur për ushqim, ndaj shkrirja e tyre rrezikon zhdukjen.

Për shkak të humbjes së vazhdueshme të habitatit të akullit në det nga ndryshimet klimatike, arinjtë polarë u konsideruan si një specie e kërcënuar në SHBA në vitin 2008.

Por rritja e temperaturave ka sjellë dhe ndryshimin e sjelljes dhe përshtatjen e specieve duke bërë të mundur që një pjesë e tyre të mbijetojë. një studim i botuar në Ditën Ndërkombëtare të Arinjve polarë, tregon se numri i tyre është rritur në nivelet më të larta gjatë viteve të fundit. Raporti për vitin 2018, i botuar nga Fondacioni për Politikat e Ngrohjes Globale, konfirmon se arinjtë polarë vazhdojnë të shtohen, pavarësisht reduktimeve të niveleve të akullit në det.

Autori i raportit, zoologu Susan Crockford thotë se, janë njerëzit që jetojnë në rrethin e Arktikut, ata që duhet të shqetësohen nga prania e arinjve polarë gjatë gjithë vitit. Kjo pasi arinjtë u afrohen zonave të banuara. Tashmë janë konstatuar edhe raportimet shqetësuese për njerëz të kërcënuar apo edhe të vrarë prej tyre, veçanërisht në Nunavuti, në veri të Kanadasë.