Pse në të ardhmen nuk do ketë më kushërinj?

Koncepti tradicional i familjes, i karakterizuar nga një rrjet horizontal i të afërmve si kushërinjtë, vëllezërit dhe dajat, po pëson një ndryshim të thellë. Këto lidhje, që i përkasin të njëjtit brez, po humbasin gradualisht terren dhe prania e tyre mund të zvogëlohet gjithnjë e më shumë me kalimin e kohës.

Evolucioni i strukturave familjare – i sjellë nga reduktimi i lindjeve dhe zgjedhja gjithnjë e më e përhapur për të mos pasur fëmijë ose për t’i pasur ata në një moshë më të pjekur – ngre pyetje të rëndësishme në lidhje me qëndrueshmërinë e kujdesit shëndetësor dhe sistemeve të sigurimeve shoqërore. Me një popullsi në plakje dhe një rënie të lindjeve, pyetja është se si do të menaxhohen nevojat për kujdes afatgjatë dhe cilat do të jenë implikimet ekonomike dhe sociale në mbarë botën.

“Në të ardhmen nuk do të ketë më vëllezër apo kushërinj”, thotë një studim i fundit i botuar në Pnas. Kërkimi multidisiplinar hodhi një vështrim të thellë në dinamikat e ardhshme të familjes në mbarë botën.

I kryer nga ekspertë si Diego Alburez-Gutierrez i Institutit Max Planck për Kërkime Demografike në Rostock, Ivan Ëilliams i Universitetit të Buenos Aires dhe Hal Casëell i Universitetit të Amsterdamit, hulumtimi propozon një sërë parashikimesh të bazuara në dinamikat aktuale demografike.

Analiza fokusohet në strukturat e farefisnisë dhe ndryshimet e parashikuara në madhësinë dhe përbërjen e familjeve deri në vitin 2100. Një nga aspektet më të rëndësishme të studimit është parashikimi i një rënie të ndjeshme të numrit të të afërmve për individ me kalimin e kohës. Për shembull, siç lexojmë në studim, në vitin 1950 një grua 65-vjeçare mund të llogariste në një rrjet familjar të përbërë nga 41 persona, ndërsa në vitin 2095 kjo shifër është e destinuar të bjerë në vetëm 25 të afërm.

Parashikimet tregojnë se ndryshimi do të jetë më i theksuar në disa rajone se të tjerat.

Në Evropë dhe në Shtetet e Bashkuara, për shembull, pritet një rënie e ndjeshme e numrit të të afërmve, me kalimin nga 25 të afërm në 1950 në 15.9 në 2095.

Rezultatet e testimit mund të jenë shumë të ndryshme në Afrikën Sub-Sahariane, ku pritet një rritje e konsiderueshme e popullsisë. Një situatë krejtësisht e ndryshme në Amerikën Latine dhe Karaibe, ku studimi parashikoi një rënie të paprecedentë të madhësisë së familjes.