Rekord historik, një kopje e “Superman” e gjetur rastësisht shitet për 9.12 milionë dollarë

Teksa pastronin papafingon e nënës së tyre të ndjerë në Kaliforni Krishtlindjen e kaluar, tre vëllezër bënë një zbulim që ua ndryshoi jetën nën një grumbull gazetash të zverdhura: një nga komikët e parë të Supermanit të botuar ndonjëherë.

Një kopje origjinale e edicionit të parë të qershorit 1939 mbi aventurat e Njeriut prej Çeliku ishte në një gjendje jashtëzakonisht të paprekur. Tani, ai është bërë stripi komik më i shtrenjtë i shitur ndonjëherë, duke arritur shifrën 9.12 milionë dollarë (7 milionë paund) në ankand.

Shtëpia e ankandeve Heritage Auctions me bazë në Teksas, e cila organizoi shitjen të enjten, e quajti atë “kulmin e koleksionimit të komikëve”. Vëllezërit gjetën gjashtë komikë, përfshirë Superman #1, në papafingo brenda një kutie kartoni të rrethuar nga rrjeta merimangash në vitin 2024, tha Heritage në një njoftim për shtyp.

Ata pritën disa muaj para se të kontaktonin shtëpinë e ankandeve, por sapo e bënë, nënpresidenti i Heritage Auctions, Lon Allen, i vizitoi ata në San Francisko brenda pak ditësh. Vëllezërit, të cilët kanë zgjedhur të mos i bëjnë publikë emrat, janë “në të 50-at dhe 60-at e tyre, dhe nëna e tyre u kishte thënë gjithmonë se kishte një koleksion të shtrenjtë komikësh, por kurrë nuk ua tregoi atyre”, tha Allen.

Nëna e tyre i kishte ruajtur komikët që kur ajo dhe vëllai i saj i blenë ato midis Depresionit të Madh dhe fillimit të Luftës së Dytë Botërore. Allen shtoi se klima e freskët e Kalifornisë veriore ishte perfekte për ruajtjen e letrës së vjetër. Kjo ndihmoi CGC, një shërbim i madh i palës së tretë për vlerësimin e komikëve, t’i jepte kësaj kopjeje të Superman #1 një vlerësim 9.0 në një shkallë 10-pikëshe, duke kaluar rekordin e mëparshëm prej 8.5.

Me çmimin e shitjes prej mbi 9 milionë dollarësh, Superman #1 kaloi lehtësisht rekordin e mëparshëm me 3 milionë dollarë. Rekordi i mëparshëm mbahej nga Action Comics Nr. 1, vepra e vitit 1938 që prezantoi për herë të parë Supermanin, e cila u shit për 6 milionë dollarë vitin e kaluar.

Vëllai më i vogël tha se kutia kishte mbetur e harruar në pjesën e pasme të papafingos. “Kjo nuk është thjesht një histori për letër dhe bojë të vjetër,” shtoi ai. “Kjo është një dëshmi për kujtesën, familjen dhe mënyrat e papritura sesi e kaluara gjen rrugën për t’u kthyer tek ne.”