Vdes në Japoni njeriu më i vjetër në botë, në moshën …

Është shuar në moshën 113-vjeçare Masazu Nonaka, njeriu më i moshuar në botë, një rekord që i takonte pikërisht atij vitin e shkuar nga “Guinness”. Nonaka jetonte në rajonin më verior të arkipelagut, Hokkaido dhe kishte lindur në qytetin e Ashoros, ku së bashku me familjen drejtonte një stabiliment termal.

Data e lindjes së tij, 25 korrik 1905, përkon me zbulimin e teorisë së relativitetit nga Albert Ajnshtajni. Sipas tregimeve të familjes së tij, pavarësisht nga përdorimi i një karrigeje me rrota, Nonaka bëri pjesën më të madhe të punës në mënyrë të pavarur, kishte qejf ëmbëlsirat pas makaronave dhe ishte i interesuar të shikonte ndeshjen sumo në televizor si dhe të lexonte gazetat.

Gruaja e tij, me të cilën kishte dy djem dhe tre vajza, kishte vdekur në vitin 1992. “Ne jemi të tronditur nga humbja e një figure kaq të rëndësishme, vetëm pak orë më parë ai ishte në gjendje të mirë, si zakonisht. Ai u shua papritmas, sikur të mos donte të shkaktonte probleme për familjen tonë “, tha nipi i tij, Yuko.

Japonia është një nga vendet me shkallën më të lartë të jetëgjatësisë në botë. Regjistrimi i personit më të moshuar ndonjëherë i takon në fakt një japonezi tjetër, i cili vdiq kur ishte 116 vjeç dhe 54 ditë në qershor 2013.