Në protestën e 108-të të zhvilluar para Kryeministrisë, aktivisti dhe bashkë-organizatori Arben Kola bëri thirrje për vijimin e tubimeve dhe intensifikimin e presionit publik ndaj qeverisë. Në fjalën e mbajtur para protestuesve, Kola kërkoi që institucionet e drejtësisë të vijojnë hetimet ndaj zyrtarëve të lartë, duke iu drejtuar në mënyrë të veçantë Prokurorisë së Posaçme kundër Korrupsionit dhe Krimit të Organizuar (SPAK).
“Veliaj në qeli dhe shqiptarët të lirë. Radhën e ka Rama me Belinda Ballukun. Ju ftoj çdo ditë në shesh të rrisim presionin popullor”, deklaroi Kola. Aktivisti u ndal edhe te roli i SPAK-ut, duke kërkuar që hetimet dhe procedimet ndaj zyrtarëve të vijojnë. Sipas tij, ky institucion ka një rol të rëndësishëm në luftën kundër korrupsionit dhe asaj që ai e cilësoi si kapje të shtetit nga mafia.
“I bëjmë thirrje SPAK-ut: vazhdo me arrestime. I vetmi institucion që bën të mundur çlirimin e Shqipërisë nga kapja e mafies antishqiptare, e udhëhequr nga Rama”, u shpreh ai. Kola u bëri thirrje qytetarëve që të vijojnë të marrin pjesë në protestat para Kryeministrisë, duke kërkuar rritjen e presionit publik ndaj mazhorancës.
