12 vatra zjarri brenda pak orësh, Ministria përditëson informacionin: Flakët riaktivizohen në Dajt dhe Bulqizë

Ministria e Mbrojtjes ka përditësuar situatën e zjarreve në vend. Deri në orën 14:00 të 29 gushtit janë raportuar 12 vatra zjarri, nga të cilat 4 vijojnë të jenë aktive dhe 3 të tjera janë nën mbikëqyrje. Për përballimin e situatës janë angazhuar 214 forca operacionale, 6 automjete zjarrfikëse, 75 efektivë të Forcave të Armatosura dhe 3 helikopterë.

Situata më problematike paraqitet në Dajt, në drejtim të Qafë-Priskës, përballë Farkës, ku janë riaktivizuar dhe përhapur flakët. Në zonë po punojnë 25 forca zjarrfikëse dhe të AZM-së, si dhe 20 efektivë të Forcave të Armatosura. Ndërhyrja nga ajri po kryhet me dy helikopterë.

Në Vajkal të Bulqizës janë angazhuar gjithashtu forca të shumta. Operacioni mbështetet nga një helikopter dhe 30 efektivë të Forcave të Armatosura, në bashkëpunim me zjarrfikësit, shërbimet pyjore dhe vullnetarët.

Aktive vijojnë të jenë edhe vatrat në Qafë të Helmës dhe Sllatinë të Dibrës. Në Qafë të Helmës situata po monitorohet dhe nuk raportohet për zhvillime të reja apo rrezik për zonat e banuara.

Në Sllatinë janë angazhuar 78 forca nga MZSH-ja, shërbimi pyjor, ADZM-ja, bashkia dhe vullnetarët. Vatrat në Komsi, Malin e Dardhës dhe Malin e Qukësit janë izoluar ose ndodhen nën mbikëqyrje dhe nuk paraqesin rrezik për zonat e banuara.

Zjarri në Delisuf të Vlorës është shuar plotësisht. Flakët përfshinë rreth 2 hektarë sipërfaqe me shkurre.