12-vjeçarja mesazh të fortë në protestën e Korçës për Zvërnecin: Frika po na dëbon nga ky vend

Një nga momentet më emocionuese të protestës së mbajtur në Korçë kundër projektit në Zvërnec ishte fjala e një vajze 12-vjeçare, e cila iu drejtua qytetarëve me një mesazh të fortë për të ardhmen e brezit të saj. Në fjalën e saj, ajo përcolli një mesazh që preku të pranishmit dhe u kthye në një nga çastet më të komentuar të protestës.

“Shumë prej jush mund të jeni duke menduar që jam shumë e vogël për të qenë këtu. Mund të jetë e vërtetë, por nuk jam aq e vogël sa për të mos kuptuar gjërat që po ndodhin rreth e rrotull meje, se si kjo tokë, për të cilën kanë luftuar parardhësit tanë, po shitet pa dy mendje.

Jam 12 vjeç, dua të ëndërroj për shkollën time dhe të plotësojë ëndrrat e mia, por është shumë e vështirë për mua, sepse po mendoj për të gjitha gjërat që shqetësojnë familjen time dhe shumë familje shqiptare. Shikoj të rinj të stresuar për situatën ekonomike, të moshuar me lot në sy nga malli për fëmijët e tyre.

Më vjen shumë keq kur shoh motrën time ekselente që do të shkojë jashtë shtetit. Unë e dua Shqipërinë dhe dua të jetoj këtu. Dua shumë që të kem një shkollim këtu, e prindërit e mi një punë. Ne jemi fëmijët e këtij vendi, e ardhmja e Shqipërisë. Na jpeni arsye të qëndrojmë, mësojmë dhe ëndërrojmë pa pasur frikën se do na dëbojnë nga vendi ynë. Unë nuk do kem frikë se frika është ajo që po na dëbon nga ky vend”,– tha ajo.