122 ditë protestë, Lika-SPAK-ut: Dorëzo në Kuvend kërkesën për imunitetin e Ballukut. Nuk ikim nga sheshi pa largimin e Ramës

Në ditën e 122-të të protestës para Kryeministrisë, aktivisti Edison Lika deklaroi se protestuesit do të vijojnë rezistencën deri në largimin e kryeministrit Edi Rama dhe qeverisë së tij. Aktivisti foli edhe për zhvillimet në drejtësi dhe hetimet ndaj zyrtarëve të lartë, duke pretenduar se SPAK ka ushtruar presion ndaj disa eksponentëve të Partisë Socialiste.

”SPAK ka vënë me shpatulla pas muri elementë të PS”, deklaroi Lika, duke edhe i bërë thirrje SPAK-ut të vijojë hetimet ndaj zyrtarëve nën hetim dhe përmendi në mënyrë të veçantë ish-zv.kryeministren Belinda Balluku. “Edhe në tetor presim që SPAK të dërgojë në Kuvend kërkesën për heqjen e imunitetit të Ballukut, sepse kështu Rama do të mbetet vetëm”, tha aktivisti.

Lika u shpreh edhe se protestuesit do të vijojnë të qëndrojnë në shesh dhe nuk do të heqin dorë nga kërkesat e tyre. ”Fundin Rama e ka afër; ne nuk tërhiqemi e as nuk dorëzohemi”, përfundoi ai.