24 vatra zjarri janë regjistruar në të gjithë vendin deri në orën 17:00, ndërsa 8 prej tyre vijojnë të jenë aktive. Situata paraqitet më e rënduar në Gojan të Pukës, ku flakët janë afruar pranë banesave dhe deri tani janë djegur 4 banesa të pabanuara.
Sipas Ministrisë së Mbrojtjes, në përballimin e situatës janë angazhuar të paktën 639 forca, mes strukturave vendore e rajonale dhe Forcave të Armatosura. Operacionet mbështeten nga 5 automjete zjarrfikëse, 4 helikopterë dhe 2 avionë Air Tractor.
Në Gojan–Gjegjan–Tërbun të Pukës, situata vijon të jetë kritike në disa zona. Në terren janë angazhuar 255 forca dhe 11 mjete zjarrfikëse, ndërsa ndërhyrja po mbështetet edhe nga dy helikopterë të Forcave të Armatosura.
Situata është përmirësuar në sipërfaqet pyjore të Gojanit, në lagjen Meshursh, Gojan i Vogël dhe Gjegjan. Megjithatë, zjarri mbetet aktiv në drejtim të Gojanit të Vogël dhe zonës së Prozhemit.
Më e rënduar paraqitet situata në lagjen Pepaj, në Gojan të Madh, ku vatra e zjarrit është afruar pranë banesave. Deri tani raportohet për 4 banesa të pabanuara të djegura, ndërsa një banesë e banuar që ndodhej në rrezik është shpëtuar nga ndërhyrja e forcave në terren.
Për mbrojtjen e banesave janë dislokuar 5 mjete zjarrfikëse dhe 30 efektivë ushtarakë, ndërsa vijon ndërhyrja nga ajri me një helikopter.
Zjarre edhe në Mirditë, Vlorë dhe Tiranë
Në Shtanë të Mirditës, zjarri ka rrezikuar banesat dhe për këtë arsye Policia e Shtetit ka kryer evakuimin e banorëve të rrezikuar. Në zonë është vendosur edhe një ambulancë, ndërsa operacioni mbështetet nga dy helikopterë dhe dy mjete zjarrfikëse të Forcave të Armatosura.
Në Dukat të Vlorës, zjarri ka marrë shtrirje të konsiderueshme në drejtim të malit, por aktualisht nuk raportohet rrezik për banesat. Ndërhyrja po kryhet nga toka dhe nga ajri, me dy avionë Air Tractor.
Ndërkohë, në Dajt të Tiranës vijon puna për izolimin e vatrave të mbetura. Një pjesë e tyre është izoluar plotësisht dhe aktualisht nuk ka rrezik për zonat e banuara. Në Mal Milot të Kurbinit, zjarri është shuar dhe zona vijon të mbahet nën mbikëqyrje.
Agjencia Kombëtare e Mbrojtjes Civile vijon monitorimin e situatës në të gjithë territorin, në koordinim me prefekturat, bashkitë dhe strukturat e Mbrojtjes Civile, ndërsa forcat në terren mbeten në gatishmëri për ndërhyrje, me prioritet mbrojtjen e jetës, banesave dhe pasurisë së qytetarëve.