Sali Berisha ka reaguar pas ngjarjes së rëndë të ndodhur në fshatin Domen të Postribës, ku një zjarr i fuqishëm përfshiu një banesë dhe shkaktoi një tragjedi të rëndë familjare.
Përmes një postimi, kreu i PD-së shprehet i tronditur për humbjen e jetës së Bleona Çelajt, 24 vjeç, dhe dy fëmijëve të saj të mitur, të cilët, sipas tij, ishin kthyer nga Gjermania për të kaluar pushimet në vendlindje.
“Dhimbje e madhe!”, shkruan Berisha, teksa ngre shqetësimin për mënyrën e reagimit ndaj kësaj tragjedie. Ai e cilëson indiferencën si një faktor që rëndon edhe më shumë një ngjarje të tillë të dhimbshme njerëzore.
Postimi i plotë
Ngjarje e tmerrshme në fshatin Domen, Postribë.
Të dashur miq, mediat njoftojnë se si pasojë e zjarrit në një banesë kanë mbetur të djegur një nënë 24-vjeçare Bleona Çelaj dhe dy fëmijët e saj të mitur, përkatësisht 3 vjeç dhe 1 vjeç e gjysmë te kethyer nga Gjermania per pushime ne vendlindje.
Kjo tragjedi e rëndë njerëzore ndodhi pasi, kur shërbimi zjarrfikës mbërriti në fshatin Domen, banesa ishte përfshirë plotësisht nga flakët.
Ata gjetën trupin e pajetë të njërit prej fëmijëve, ndërsa për fatin e nënës dhe të fëmijës tjetër ende nuk dihet asgjë. Dhimbje e madhe! Indiferenca është ortaku i zjarrit në këtë tragjedi tepër të dhimbshme njerëzore.