4 vatra zjarri në kurorën e Tiranës, Balla: Janë nga robi! Zjarrvënia dënohet deri në 15 vite burg

Një zjarr i përmasave të mëdha përfshiu pasditen e së mërkurës zonën e Daiasit në Tiranë, duke shkaktuar një situatë të vështirë për shkak të përhapjes së shpejtë të flakëve.

Për përballimin e situatës u angazhuan forcat zjarrfikëse dhe strukturat e tjera në terren, ndërsa ndërhyrja nga ajri u mbështet edhe nga helikopterë të Forcës Ajrore. Në mbrëmje, kreu i grupit parlamentar të Partisë Socialiste, Taulant Balla, reagoi lidhur me situatën dhe kritikave për përdorimin e mjeteve ajrore. Ai theksoi se operacioni po zhvillohet në disa drejtime, me angazhimin e forcave në tokë dhe në ajër.

”Ku janë avionët? Ku janë avionët? Në terren janë avionë, helikopterë, makina të reja dhe të vjetra zjarrfikëse, zjarrfikës e forca të armatosura. Vetëm në kurorën e Tiranës janë aktualisht katër vatra zjarri: Priskë, Daias, Surrel, Gurrë. Nuk janë zjarre nga Zoti, po nga robi. Ndezje të qëllimshme. Ata që ndezin zjarre duhet ta dinë se zjarrvënia është vepër e rëndë penale dhe dënohet deri në 15 vite burg”,-shkruan Balla.