44 ditë protestë, profesori Lush Susaj: Shoqëria të kalojë në pluralizëm real

Sot bëhen 44 ditë protestë antiqeveritare. Të mbledhur tek sheshi ”Skëndërbej”, protestuesit duan largimin e menjëhershëm të kryeministrit Edi Rama. Me pankarta në duar e thirrje kundër korrupsionit qytetarët dhe përfaqësuesit e opozitës kanë krijuar një atmosferë tejet të ndezur në qendër të Tiranës. Sipas pjesëmarrësve, kjo protestë nuk do të ndalet dhe nuk do të ketë tërheqje deri në plotësimin e kauzës së tyre kryesore.

Profesori Lush Susaj kritikoi ata që sipas tij pengojnë zhvillimin e protestës, duke kërkuar që shoqëria shqiptare të ecë drejt një pluralizmi më të vërtetë dhe një demokracie funksionale. Ai theksoi se pa një ndryshim në mënyrën e funksionimit të shoqërisë dhe politikës, Shqipëria nuk mund të arrijë një stabilitet afatgjatë.

”Kjo është ngjarja më e bukur. Protestën e parë e shkarravitën, e degjeneruar në 2018-2019, ndërsa kjo është ndryshe, Këto janë stade shoqërore të tjera. Turpi i mbuloftë ata shqipfolësa që pengojnë protestën. Duhet shoqëria të kalojë në pluralizëm real dhe demokraci. Ne kurrë nuk do të jemi mjedis shoqëror e politik i qëndrueshëm. Këtë protestë e shoh si bashkim kombëtar”, tha ai për ”News 24”.