51 ditë protestë, aktivisti thirrje qytetarëve për deputetët: Më 23 korrik t’u japim përshëndetjen e fundit

Aktivisti Edison Lika u bën thirrje qytetarëve t’i bashkohen protestës së paralajmëruar për më 23 korrik para Kuvendit, duke e cilësuar atë si një moment të rëndësishëm për reagimin qytetar. Lika tha se protesta është pjesë e një revolte që sipas tij ka hyrë në ditën e 51-të dhe ka ndryshuar raportin e qytetarëve me demokracinë në vend. Ai kritikoi deputetët, duke pretenduar se ata shmangin përballjen me qytetarët dhe nuk përfaqësojnë interesin publik.

“Jemi në ditën e 51-të të kësaj revolte, e cila i ka ndryshuar faqen dhe raportin me demokracinë Shqipërisë. Shumë prej nesh shkuam të prisnim deputetët tanë dhe, pavarësisht se thamë se do të ishim paqësorë, ata u futën skutave. Më thoni, çfarë përfaqësuesish të popullit janë këta, që kanë frikë nga populli që supozohet se i ka votuar? Ata nuk janë përfaqësuesit tanë; janë përfaqësues të oligarkisë ekonomike dhe të krimit të organizuar shqiptar në Parlament.

Ka disa ditë që është bërë thirrja që, më 23 korrik, kur është parashikuar seanca e fundit, të jemi para Parlamentit. Data 23 korrik është fshirë dhe thuhet se nuk do të ketë asnjë mbledhje, sepse kanë frikë nga ne. Të kujt janë deputetët dhe kryetari i Kuvendit, që kanë frikë ta shpallin seancën plenare? Nëse do të ketë seancë plenare, ne do të jemi aty për t’ju dhënë përshëndetjen e fundit.

Ata fshihen, sepse nuk kanë guxim të na shohin në sy. E dinë se nuk e kanë ngritur kurrë kartonin për të mirën e Shqipërisë, por për ta vjedhur atë. Ndaj, në seancën e datës 23, do të jemi atje më të fortë dhe më të zëshëm se kurrë për të thënë se nuk na përfaqësoni. Nuk na përfaqëson as Sara Mile e krimit, as ajo injorantja Zegjineja dhe as Albana Vokshi. Ne përfaqësojmë vetë veten tonë. Përfaqësojmë ata që kanë probleme në këtë shoqëri”, tha ai.