Protesta e 86-të në Tiranë vijon me pjesëmarrjen e qytetarëve që shprehin pakënaqësi ndaj situatës politike dhe sociale në vend. Një prej protestuesve tha se problematikat që i kanë nxitur të dalin në rrugë janë të shumta, duke përmendur gjendjen e infrastrukturës, arsimit dhe shëndetësisë në zonat jashtë kryeqytetit.
“Janë 101 mijë arsye që na sjellin në protestë”, u shpreh ai, duke shtuar se shumë qytetarë nuk po gjejnë zgjidhje për problemet e tyre. Protestuesi kritikoi edhe klimën e sigurisë në vend, ndërsa akuzoi klasën politike për përgjegjësi ndaj situatës së krijuar. Sipas tij, Tirana po përballet me probleme të lidhura me krimin dhe drogën.
Në vijim të protestës, ai bëri thirrje për më shumë organizim dhe qëndresë qytetare, duke e konsideruar momentin si vendimtar për kërkesat e protestuesve. Protesta ka hyrë në ditën e 86-të, ndërsa pjesëmarrësit kërkojnë ndryshime politike dhe masa konkrete për problematikat që, sipas tyre, shqetësojnë qytetarët në të gjithë vendin.
