97 ditë protestë, Aliaj: Rama kapitullon para bandave, shqiptarët nuk i nënshtrohen autokracisë

Aktivisti Mirjan Aliaj deklaroi se prej 97 ditësh qytetarët vijojnë protestat, duke refuzuar t’i nënshtrohen qeverisjes së kryeministrit Edi Rama, të cilin e cilësoi si arrogant, autokrat dhe kriminel. Aliaj akuzoi kryeministrin se gjatë natës përdor strukturat e Policisë së Shtetit për të frikësuar protestuesit, ndërsa theksoi se lëvizja do të vijojë deri në largimin e Ramës dhe qeverisë së tij.

“Edi Rama, i cili na jep besën ditën, natën tregohet i pabesë. Është i gatshëm natën të instrumentalizojë policinë për të na trembur. Por ne do të jemi çdo ditë, siç kemi bërë për 97 ditë, për të larguar Edi Ramën dhe qeverinë e tij”, u shpreh Aliaj.

Sipas aktivistit, kryeministri ka pësuar një humbje të thellë politike gjatë këtyre javëve, ndërsa e cilësoi Pallatin e Brigadave, ku zhvillohen takime me ministra dhe deputetë, si një “pallat morti”. “Edi Rama në këto 97 ditë ka vdekur politikisht. Sidomos javët e fundit kemi parë se si të gjithë ata ministra e deputetë që i qëndrojnë afër kanë pranuar vdekjen politike të Ramës”, deklaroi ai.

Aliaj paralajmëroi gjithashtu se protestat do të vijojnë nëse Rama nuk jep dorëheqjen. “Në rast se Rama nuk dorëhiqet, ne do të kujdesemi që ta rrëzojmë”, tha aktivisti, duke iu referuar edhe përplasjes së ndodhur një ditë më parë në Vlorë, për të cilën akuzoi kryeministrin se kishte “pranuar kapitullimin para bandave”.