A do ketë probleme zgjedhja e Presidentit?!

Nga Sadedin Çeliku

Zgjedhja e Presidentit sipas Kushtetutës në fuqi do të prodhojë kurdoherë një njeri që ulet në poltronin e Presidentit, por jo në atë të kreut shtetit.  Posti i Presidentit gjithnjë është trajtuar si vend pune sepse punëmarrësi me këtë rast është partia që i siguron atij 71 vota parlamentare dhe kësisoj ai duhet të tregojë mirënjohje dhe të sillet mirë me padronët që e kanë zgjedhur.  Ka qëlluar mjaft herë t’i vëmë faj Presidentit që s’del mbi palët, që nuk zgjidh krizat sa herë që ato shfaqen,  por të gjithë e kanë gabim se i gjori President s’ka faj sepse s’ia fërshëllen askush, por s’ka dhe hapësira ligjore e kushtetuese të vihet në rolin që i takon.  Ai vend pune ka disa favore personale sepse shkon jashtë shtetit ku i do qejfi, ka një benz presidencial dhe një eskortë rojesh,  por ka dhe një pagë që në kushtet shqiptare konsiderohet e majme. Pra Presidenti nuk ka asnjë rëndësi e rol dhe aq më tepër kur ky post i shitet njerëzve që nuk kanë performancën e duhur sepse shikohet gjithnjë si një vend pune pse jo dhe si hyzmeqar i partisë që e ka promovuar.

E parë në këtë këndvështrim, gjykoj se dy forcat kryesore politike të maxhorancës do të vendosin deri më 19 prill të këtij muaji se kush do të jetë i punësuari i radhës në presidencë dhe kundërshtitë mund të vijnë vetëm se kush do ta marrë, PS-ja apo LSI-ja, e cila gjithmonë kërkon të bëhet faktor më shumë se sa i takon. Personalisht mendoj se pozicioni në fjalë mund t’i jepet dhe LSI-së në këmbim të marrëveshjes së koalicionit me Partinë Socialiste edhe për një mandate tjetër meqenëse këtij të fundit nuk po i premtohet pozicioni i Kryeministrit pas zgjedhjeve të 18 qershorit.  Pra gjykoj se kompromisi do bëhet dhe pa asnjë problem. Çështjet e tjera që lidhen me kandidaturën konsensuale nuk më duken me vend sa kohë maxhoranca ka votat e nevojshme për ta zgjedhur Presidentin qysh në votimin e parë dhe kushtetutën, e cila e ka paraparë atë ligjërisht.  Duke pasur parasysh se krizat sa herë janë shfaqur në Shqipëri i ka zgjidhur faktori ndërkombëtar, mendoj se pavarësisht paketave të ndryshimeve ligjore që i janë bërë kushtetutës, është e nevojshme që Presidentin ta zgjedhë populli dhe jo të bëhet si dhe deri sot pazar të politikës për të favorizuar politikën e pushtetin.

Meqenëse vendi ynë i dalë nga diktatura dhe me një demokraci të çalë e të brishtë ka pasur gjithnjë probleme e kriza, duhet t’i japi mundësi gjithkujt të garojë për postin e Presidentit. Me këtë rast, pa zbehur vlerat dhe rëndësinë e parlamentit, nuk do ishte keq një republikë gjysmë presidenciale dhe gjysmë parlamentare të modelit bullgar kurse kodi zgjedhor grek më duket mjaft i përshtatshëm për rastin e Shqipërisë që jemi të prirur të krijojmë kriza të kota dhe shpesh artificiale. Tashmë është koha të shikojmë se si do zhvillohen ngjarjet në ditët në vijim.