A do të qëndrohet në shesh? Një prej organizatorëve të protestës që vijon çdo mbrëmje përballë Kryeministri, Luçiana Kokaj, e ftuar në ”Koha Jonë-Debat” me Nikoll Lesin, tha se në ditën në vijim qëndrimi në shesh do të strukturohet shumë mirë.
Lesi: Zonja Kokaj a është menduar të qëndrohet në shesh ditë natë dhe të asfiksohet qeverisja? Por mund të ketë edhe përplasje të dhunshme që siç tha Arben Kola, ”që rininë mos e ngacmoni, mos e provokoni”, pra a ka plan C? Sepse plani A ishte Zvërneci, plani “B” u bë dorëheqja e kryeministrit pa lidhje me Zvërnecin…
Kokaj: Nuk e kemi diskutuar deri më tani dhe kanë filluar që të shtunën në darkë një grup njerëzish po flejnë në shesh, po qëndrojnë gjithë natën para Kryeministrisë. Ishte iniciativë e disa individëve e tyre, e bënë. Patjetër që duke qenë një protestë qytetare me pjesëmarrje të lartë, gjithse kush ka të drejtën e vet të shprehet në mënyrën e vetë dhe të reagojë në mënyrën e vetë. Besojmë që është gjë e bukur dhe mbase ditët në vazhdim do duhet strukturuar më mirë që qëndrimi 24 orë të jetë para kryeministrisë…
