E ftuar në ”Koha Jonë-Debat”, aktivistja Luçiana Kokaj ka komentuar mbi pretendimet që lidhen me ndikimin e Fondacionit “Soros” në protestat e këtyre javëve.
E pyetur nga Nikoll Lesi nëse fondacioni ka ndikim në organizimin e protestave, Kokaj u shpreh se nuk beson në një ndërhyrje të tillë dhe se shpesh krijohen thashetheme për individë të ndryshëm që kanë qenë të përfshirë në projekte të mbështetura më parë nga Soros.
Lesi: E nderuar zonjë, më lejo të bëj një pyetje. Fondacioni i Sorës a ka gisht në këtë Lëvizje-protestë?
Kokaj: Unë nuk besoj që ka gisht.
Lesi: Nuk beson apo s’ke informacion?
Kokaj: Shiko tani se aty dalin thashetheme për çdo njeri. Del e flet njëherë në mikrofon dhe të nesërmen dëgjon pesë lajme për atë personin. Tani nuk ka njeri në Shqipëri që nuk ka qenë një moment të caktuar, mbase mbështetës i një partie politike që nuk ka një të shkuar dhe ti nuk mund t’i gozhdosh njerëzit sepse në një moment të caktuar kanë marrë një projekt, kanë bërë një projekt dhe ai projekti është sponsorizuar nga Soros.
Lesi: Unë them shtabi drejtues, shtabi qendror, nëse mund ta quajmë kështu i protestës.
Kokaj: Nuk ka ndërhyrje fare tani se ata dalin e thonë për Andi Tepelenën që është një zotëri aktivist, artist që bën aktivizëm dhe dalin tashetheme se është i Sorosit. Unë nuk shikoj asnjë moment që Andi imponon mendime. Unë nuk shikoj asnjë moment që Andi mundohet të tjetërsojë protestën. Unë e shikoj Andin si një djalë që e mbështet shumë fort protestën edhe kauzën. Në qoftë se Andi në një moment të caktuar të jetës së vet ka marrë një projekt i cili është financuar nga Sorosi, ti do thuash që është një person që punon për Sorosin, nuk e besoj.