Administrativja shtyu seancën, avokati i Veliajt: Ols Dado, një qytetar që ka marrë atributet e një prokurori!

Avokati i kryebashkiakut të Tiranës, Erion Veliaj foli pas senacës këtë të premte në Gjykatën Administrative. Plarent Ndreca tha se emërimi i Ols Dados si prokuror është i pavlefshëm, duke theksuar se edhe nga qëndrimi i Presidencës u konfirmua se kriteret ligjore nuk janë përmbushur dhe se nëse procedura do të zhvillohej sot, ai nuk do të mund të emërohej në këtë detyrë.

”Doli i qartë në këtë gjykim edhe nga pyetjet që i bëmë përfaqësuesit të palës së paditur. Nëse plotëson ose s’i plotëson kriteret dhe doli e qartë që s’janë të plotësuara. E gjithë padia ka një qëllim që të investojë gjykatën dhe sot kemi një prokuror që po ngre padi ndaj Erion Veliajt apo një qytetar i thjeshtë që ka marrë atribute të një prokurori.

Kjo hap një precedent, çdo qytetar mund të bëhet prokuror dhe të kthehet në prokuror në shkelje të afateve. Pyetja është a është apo s’është prokuror Dado? Kemi të bëjmë me një akt absolutisht të pavlefshëm dhe kemi kërkuar konstatim të pavlefshmërisë absolute. Doli e qartë aga mospërgjigjja e tij që kriteret e nenit 18 nuk plotësohen. Doli edhe nga përgjigja e përfaqësueses së presidencës.

Ne presim nga pala e paditur që të na provojë të kundërtën nëse ka ushtruar detyra në ato raste që ligji i konsideron si shkaqe përjashtimore. Kjo s’është shkelje, është mosplotësim kriteresh, paligjshmëri dhe pavlefshmëri. Secili prej nesh mund të bëhet prokuror dhe t’u heqë lirinë njerëzve. Nuk e lejon ligji që të ekuivalohet puna si noter. Janë të përcaktuara në mënyrë shteruese dhe jo zgjeruese”, tha Ndreca.