Akademiku Fuga: Rama pranoi që ka çarje mes qeverisjes dhe opinionit publik

Akademiku Artan Fuga thotë se kryeministri Edi Rama pranoi që ka një çarje mes qeverisjes dhe opinionit publik.

“Zoti Rama pranon që ka një mospërputhje midis opinionit publik dhe qeverisjes. A e shpjegon me anë të Tokëvilit, a e shpjegon me anë të një autori tjetër modern, a e shpjegon me anë të autorëve shqiptarë, a ka konstatime të veta, fakti është që zoti Rama pranon në atë mbledhje se midis qeverisjes dhe opinionit ka një të çarë që ka prodhuar revoltat.

Me këtë, në një farë mënyre ai bën një lloj autokritike. Tani thekson që protestat kanë një shkak dhe shkaku është një çarje midis politikës, qeverisjes dhe opinionit publik. Këtu vjen pyetja pse ka ardhur kjo? Çfarë ka ndodhur? Qeverisja nuk njeh opinionin publik. Kjo është gjëja e parë. Nuk ecën në përputhje me opinionin publik.

E dyta, thuhet që zoti Rama pranon, duke iu referuar Tokëvilit, i cili fliste për rendin feudal, për monarkinë absolute dhe revolucionin që u bë, aty është një kontekst tjetër, konteksti që Luigji XVI, ndërmori disa reforma brenda rendit të vjetër feudal, se ka pasur padrejtësi. Pyetja ngelet që cilat janë, kush i ka krijuar, pse janë krijuar, cilat janë ato në rrafshin politik, ekonomik, social, kulturor e tërë me radhë. Pra, cilat janë padrejtësitë dhe abuzimet në Shqipërinë e sotme?”,-tha në ”A2cnn”.