Akuzat e reja për Ballukun, PD: Pse SPAK bëhet pjesë e lojës dhe i jep kohë Ramës për manovra politike?

Kreu i grupit parlamentar të PD, Gazment Bardhi, ka akuzuar SPAK-un se po hesht për rëndimin e masës së sigurimit ndaj Belinda Ballukut, edhe pse ajo është marrë e pandehur për tre akuza të reja.

Bardhi thotë se në Kuvend ende nuk ka mbërritur një kërkesë e re nga SPAK për heqjen e imunitetit të Ballukut për arrestimin e saj. Sipas tij, akuzat e reja përfshijnë korrupsion pasiv, pastrim parash dhe fshehje pasurie.

Ai pretendon gjithashtu se provat e reja kanë nxjerrë në pah dy vila të fshehura në resorte luksoze në bregdet, ndërsa përmend edhe komunikimet në email-in personal të Ballukut.

Postimi i plotë

Kanë kaluar 5 ditë që kur SPAK njoftoi se Belinda Balluku është marrë e pandehur edhe për tre akuza të reja, por në Kuvend ende nuk ka mbërritur asnjë kërkesë e re nga SPAK për heqjen e imunitetit për arrestimin e saj. Mbi ish-zv/kryeministren rëndojnë akuzat më të rënda për një zyrtar të lartë: korrupsion pasiv, pastrim parash dhe fshehje pasurie, të cilat i shtohen akuzës së parë për shkelje të barazisë në 8 procedura prokurimi me vlerë 1.2 miliardë euro.

Provat e reja faktojnë zbulimin e dy vilave të fshehura të Belinda Ballukut në dy prej resorteve më luksoze në bregdet.

Kemi parë edhe sesi shijet e zonjës Balluku për mermerin blu në vilën e Palasës konkurronin me shijet e arkitektëve për stilin dhe materialet high-end, si të jahteve apo hoteleve më luksoze. Të gjitha këto ndodhen në email-in personal të Belinda Ballukut.

Pra, akuzat janë rënduar, pozita penale e Belinda Ballukut po ashtu, por SPAK po hesht për rëndimin e masës së sigurimit. Një standard që e pranoi dhe e zbatoi në dhjetor drejtuesi i SPAK-ut, Klodian Braho. Pse SPAK bëhet pjesë e lojës politike dhe po i jep kohë Edi Ramës për manovra politike?

Edhe sa vila duhet t’i zbulohen Belinda Ballukut që SPAK t’i bindet ligjit dhe jo “Aleancës së Valamarit”?