Alarmi nga terrorizmi, Belgjika anulon të gjitha kampionatet

Aktet terroriste kanë goditur edhe sportin. Kjo për faktin se në eventet sportive grumbullohen me mijëra njerëz dhe shihet si një mundësi e mirë nga ISIS për të realizuar planet. Brukseli është vënë kështu në alarm të lartë ndaj sulmeve të mundshme terroriste. Që në orët e mëngjesit Belgjika çoi në 4 nivelin e sigurisë që përbën edhe nivelin maksimal. Qendra Kombëtare e Krizave në Belgjikë, (OCAM) kërkoi pezullimin e kampionateve të futbollit të Kategorisë së Parë dhe të Dytë, dhe vendimi për pezullimin e tyre u morr brenda pak minutash, me efekt të menjëhershëm.

Qendra Kombëtare Belge e Krizave, (OCAM), përveçse kërkoi anulimin e të gjitha eventeve që ishin parashikuar në Bruksel për këtë fundjavë si dhe mbylljen e metrosë, rekomandoi edhe anulimin e të gjitha ndeshjeve të futbollit në Divizionin e Parë dhe të dytë, vendim ky që u vu në zbatim. OCAM veç të tjerash ka kërkuar dhe përforcimin me armatime të rënda të forcave të policisë dhe atyre ushtarake.