Ambasadori Gonzato takon Kryeipeshkvin Dodaj: BE mbështet lirinë e besimit dhe harmoninë ndërfetare në Shqipëri

Ambasadori i BE-së në Shqipëri, Silvio Gonzato, zhvilloi një takim me Kryeipeshkvin e Tiranë-Durrësit, Arjan Dodaj në prag të kremtimit të Pashkës për komunitetin katolik në vend. Gjatë takimit, ambasadori Gonzato vlerësoi rolin e Kishës Katolike në promovimin e vlerave evropiane dhe në forcimin e bashkëjetesës ndërfetare në Shqipëri.

“Ishte kënaqësi të takohesha me Kryeipeshkvin Arjan Dodaj në prag të kremtimit të Pashkës për komunitetin katolik në Shqipëri. Gjatë bisedës sonë, vlerësova rolin e Kishës Katolike në Shqipëri në promovimin e vlerave evropiane, veçanërisht te të rinjtë, si edhe në ruajtjen e harmonisë ndërfetare dhe të bashkëjetesës paqësore mes besimeve”, u shpreh Gonzato.

Ambasadori i BE-së theksoi angazhimin e Bashkimit Evropian për mbrojtjen e të drejtave themelore të njeriut, përfshirë lirinë e besimit. ”BE-ja vijon të mbështesë dhe të mbrojë lirinë e fesë apo të besimit për çdo individ, në përputhje me vlerat demokratike dhe respektin për dinjitetin njerëzor”.