Anëtarësimi në BE, ministri Hoxha: Prioritet për Shqipërinë, presim sa më shpejt përmbushjen e IBAR

Në takimin me tre ministrat e Jashtëm nga Austria, Çekia e Sllovakia për formatin Slavkov (S3), ministri Ferit Hoxha ka theksuar anëtarësimin në BE si prioritet të Shqipërisë. Përpara ministrave, të cilët po zhvillojnë një vizitë në Tiranë, Hoxha u shpreh se janë gati për mbylljen e kapitujve që vjen pas përmbushjes së IBAR.

“Anëtarësimi në BE mbetet prioriteti strategjik kryesor i Shqipërisë, i mbështetur fuqimisht nga një konsensus i gjerë kombëtar. Jemi plotësisht të angazhuar për të ruajtur këtë ritëm të fortë dhe presim përmbushjen e IBAR sa më shpejt në një periudhë të afërt, duke hapur rrugën për fazën e ardhshme të negociatave, atë të mbylljes së kapitujve, për të cilën kemi punuar në mënyrë intensive dhe jemi përgatitur paralelisht”, tha Hoxha.

Ministri theksoi meritokracinë e procesit, vijimin e punës me reformat për drejtësinë, luftën ndaj korrupsionit dhe forcimin e institucioneve. Njëkohësisht, gjatë këtij takimi ka pasur diskutime për stabilitetin e Ballkanit Perëndimor dhe takimin në Bratislavë.

“Mbështetja politike për zgjerimin, integrimi gradual dhe koordinimi më i ngushtë mes shteteve anëtare të BE-së dhe Ballkanit Perëndimor duhet të mbeten në qendër të agjendës më 12 maj dhe në vijim”, thotë Hoxha ndërsa thekson se: “Ballkani Perëndimor është pjesë integrale e së ardhmes së Evropës. Në kontekstin e sotëm gjeopolitik, zgjerimi nuk është thjesht një zgjedhje politike, por një domosdoshmëri strategjike”, është shprehur ministri.