Artan Hoxha lëshon deklaratën e fortë: Ne e dimë kush e vrau Ervis Martinajn

Gazetari investigativ, Artan Hoxha, ka folur sot lidhur me çështjen e Ervis Martinajt.

Gazetari Artan Hoxha u shpreh se tashmë dihen si ekzekutori, ashtu edhe shuma e paguar për vrasjen e Ervis Martinajt, duke shtuar se ish-biznesmeni nuk arriti të kontrollonte pushtetin që kishte krijuar.

“Çfarë provash ka deri tani? Ne sot e dimë kush është edhe ekzekutori. Dimë edhe shumën që është vendosur për t’u vrarë. Nëse themi që ai që ka kryer vrasjen ka marrë 500 mijë euro, ai që e ka porositur mendon se ne nuk e dimë kush është? Ervis Martinaj nuk ishte një njeri që fshihej. Kishte qejf lokalet e natës, të shoqërohej me artistë, me politikanë, me njerëz të medias, me vajza të ekranit. Një njeri me këtë lloj horizonti dhe me kaq pushtet që mori…

Llogaria që bëri gabim Ervis Martinaj ishte se nuk e kontrolloi dot pushtetin që krijoi. Do të kërkoja minimalisht që Policia e Shtetit të japë aq prova sa ka, pa prishur hetimin, dhe të thotë: “Ervis Martinaj, nga informacionet që kemi, nuk jeton”. Babai i Martinajt vjen dhe pyet për fatin e djalit të vet. Këto informacione duhen dhënë, jo përralla për luanin”, deklaroi Artan Hoxha ditën e sotme në Top Channel.