Avokati i Veliajt: Pas 14 muajsh kërkesa të refuzuara, e takuam. Po përgatisim aplikimin për në Strasburg

Avokati ndërkombëtar i Erion Veliajt, Ben Brandon, ka deklaruar se ai dhe ekipi i tij kanë nisur përgatitjen e aplikimit që do t’i drejtohet Gjykatës Evropiane për të Drejtat e Njeriut në Strasburg.

Në një konferencë për shtyp, krah avokatit tjetër të kryebashkiakut të Tiranës, Plarent Ndreca, Brandon u shpreh se, pas 14 muajsh kërkesash të refuzuara, autoritetet shqiptare u kanë lejuar më në fund të takojnë Veliajn në paraburgimin e Durrësit.

“Ne jemi përfaqësuesit ligjorë ndërkombëtarë të z. Veliaj. Kjo është një çështje me rëndësi të lartë publike, jo vetëm në Shqipëri, por edhe jashtë saj. Jemi këtu për ta asistuar z. Veliaj në përgatitjen e aplikimit që do t’i drejtohet Gjykatës Evropiane për të Drejtat e Njeriut. Ditët e fundit i kemi kaluar në paraburgimin ku ai ndodhet, duke hartuar aplikimin, dhe do të rikthehemi sërish në shtator.

Siç e kam theksuar, ne e përfaqësojmë ligjërisht z. Veliaj që nga fillimi i ndalimit të tij.

Pas një ndryshimi të vendimmarrjes nga autoritetet në Tiranë, ndonëse me vonesë, më në fund na u dha mundësia të takohemi me z. Veliaj, pas 14 muajsh kërkesash të refuzuara.

Jemi mirënjohës për mundësinë që na është dhënë për ta takuar z. Veliaj në paraburgimin e Durrësit.

Megjithatë, riktheksojmë se refuzimi i aksesit për përfaqësuesit ligjorë të zgjedhur nga Erion Veliaj është i papranueshëm. Ndryshimi i qëndrimit të autoriteteve shqiptare mbetet i pakuptueshëm për ne. Është e drejtë themelore e tij të zgjedhë përfaqësuesit e vet ligjorë dhe të ketë akses të plotë tek ata”, u shpreh avokati Brandon.