Banka e Zvicrës trondit tregjet me vendimin e papritur

Banka qëndrore e Zvicrës, e reflektuar në këtë foto në një shatërvan në Bernë, vendosi papritur të heqë dorë nga politika e saj e ndalimit të forcimit të monedhës së vet kombëtare Franga Zvicerane poshtë kuotës 1.2 franga për euro.

Banka deklaroi më 15 janar se kjo masë e vendosur në shtator 2011 për të “mbrojtur ekonominë e Zvicrës nga dëmtime të rënda” nuk është më e justifikuar.

Franga zvicerane u forcua menjëherë pas vendimit nga 1.2 franga për euro në 1.02.

Kundrejt lekut shqiptar, franga zvicerane u shtrenjtua nga 117 në 136 lekë, raporton BIRN.

Franga dhe Zvicra janë parë gjatë viteve të krizës si një parajsë për t’u fshehur gjatë kohëve të vështira, por rritja e investimeve të huaja në Zvicër solli edhe presion të pandalshëm për forcimin e monedhës së këtij vendi.

Shumë ekspertë besojnë se ekonomia e Zvicrës, e cila varet shumë nga eksportet, do të vuajë vendimin e bankës qëndrore për të lënë monedhën e vendit të forcohet kundrejt monedhave të huaja.