BE monitoron rregulloren e re të GJKKO-së për mediat: Transparenca e proceseve është thelbësore

Bashkimi Europian ka reaguar lidhur me rregulloren e re të Gjykatës së Posaçme, e cila ka ngjallur shqetësime për kufizimin e aksesit të medias në informacionin gjyqësor. Në një reagim për Report Tv, BE bëri të ditur se është në dijeni të ndryshimeve dhe se po ndjek nga afër zbatimin e tyre. Sipas BE-së, synimi është që të gjendet një ekuilibër i përshtatshëm mes nevojës për masa sigurie dhe garantimit të aksesit në informacion, transparencës dhe standardeve europiane për proceset gjyqësore.

Bashkimi Europian thekson se çështja do të vijojë të monitorohet, ndërsa shprehet i gatshëm të ofrojë ekspertizë të specializuar si për sistemin gjyqësor, ashtu edhe për komunitetin mediatik. Reagimi i BE-së vjen në një kohë kur rregullorja e re e GJKKO-së ka hapur debat mbi kufijtë e informimit publik dhe rolin e medias në raport me proceset gjyqësore.

Reagimi i plotë

Bashkimi Europian është në dijeni të një rregulloreje të re të brendshme për sigurinë, rendin dhe rregullat e sjelljes në ambientet e Gjykatës së Posaçme të Shkallës së Parë për Korrupsionin dhe Krimin e Organizuar (GJKKO), e cila merr parasysh karakteristikat e veçanta organizative, operacionale dhe të sigurisë që lidhen me GJKKO-në dhe proceset gjyqësore të saj.

BE-ja është e gatshme të vijojë të ofrojë ekspertizë të specializuar si për sistemin gjyqësor, ashtu edhe për komunitetin mediatik, në mbështetje të gjetjes së një ekuilibri të drejtë ndërmjet masave të sigurisë dhe aksesit në informacion dhe transparencës së proceseve gjyqësore, në përputhje me standardet dhe parimet evropiane.

BE-ja do të vijojë t’i monitorojë nga afër këto çështje në kuadër të negociatave të anëtarësimit të Shqipërisë në BE.