Begaj nga Frashëri: Teqeja nuk ishte vetëm vend lutjeje, por vatër e ndërgjegjes shqiptare

Presidenti Bajram Begaj ka marrë pjesë në aktivitetet për 245-vjetorin e themelimit të Teqesë së Frashërit, një prej vendeve me rëndësi të veçantë për historinë dhe trashëgiminë shqiptare.

Në 5 shtator, ditë pelegrinazhi për besimtarët bektashinj, kreu i Shtetit nderoi figurën e vëllezërve Frashëri dhe vlerësoi rolin që kjo teqe ka pasur ndër vite në përhapjen e dijes, ruajtjen e identitetit kombëtar dhe mbështetjen e çështjes shqiptare.

“Që nga viti 1781, kur ‘hodhi çatinë’, kjo teqe nuk shërbeu vetëm si vend lutjeje. Ajo u bë shtëpi e hapur për udhëtarin, vatër dijeje e kuvendimi dhe, mbi të gjitha, vatër e ndërgjegjes shqiptare”, u shpreh Begaj.

Presidenti vlerësoi kontributin e klerikëve bektashinj në momente të rëndësishme të historisë së vendit, nga periudha e Rilindjes Kombëtare deri në konsolidimin e shtetit shqiptar.

Begaj u ndal edhe te harmonia fetare, duke theksuar se bashkëjetesa ndërfetare shqiptare është një vlerë e ndërtuar ndër breza dhe jo thjesht një çështje protokollare.

Sipas tij, pelegrinazhi në Frashër është një rikthim te rrënjët e identitetit kombëtar, ku besimi, dija dhe atdhetaria janë ndërthurur në historinë e shqiptarëve.

Në përfundim të vizitës, Presidenti Begaj vizitoi edhe shtëpinë e vëllezërve Frashëri, duke nderuar kujtimin e figurave të rëndësishme të Rilindjes Kombëtare.