Deputeti i PD-së, Belind Këlliçi thotë se protesta qytetare ka përcjellë mesazhe të rëndësishme që sipas tij do reflektohen në procesin e riorganizimit të partisë. Ai u shpreh se mbledhja e Këshillit Kombëtar, e planifikuar të mbahet të mërkurën, do të shënojë nisjen e një faze të re për PD-në.
Sipas Këlliçit, partia synon të ndërtojë një ekip drejtues që do të kombinojë përvojën e figurave politike me energjinë dhe idetë e brezit të ri. Ai theksoi se ripërtëritja, hapja ndaj prurjeve të reja dhe qarkullimi i elitave janë elementë të domosdoshëm për t’iu përgjigjur zhvillimeve politike dhe pritshmërive të qytetarëve.
Këlliçi njoftoi gjithashtu se në mbledhjen e Këshillit Kombëtar do të konstituohet forumi i ri drejtues dhe do të zgjidhen 20 anëtarët e kryesisë së re të Partisë Demokratike. Ai shprehu bindjen se mesazhet e protestës janë dëgjuar nga drejtuesit e partisë dhe do të pasqyrohen në përbërjen e strukturave të reja.
”Jam i bindur që në rezultat edhe Partia Demokratike do t’i përgjigjet, le të themi, zhvillimit shoqëror që kemi sot dhe real politikës, do t’i përgjigjet sheshit. Me një PD të ndryshuar, me një PD të ripërtëritur, me një PD me djem me vajza të rinj, me koncepte të reja, me profile të reja dhe me dhe me prurje shumë kualitative. Unë këtë e kam bindje personale dhe e shoh. Kam përshtypjen që do të shkohet në kryesi, kam përshtypjen që po në nivelet e larta patjetër do jetë një kombinim i tillë. Nuk mundet që të zhbëhet historia e PD. Duhet të kuptoni që pa diskutim që do të gërshetohet kjo me eksperiencën, me funksionarët që kanë eksperiencë, por patjetër do të mbështillet me energjinë e të rinjve, e ambiciozëve, e prurjeve të reja që janë të domosdoshme edhe në këtë moment”,-tha në ”A2cnn”.