Berisha akuzon Ramën: 490 mijë pensionistë jetojnë më keq se në sistemin e kaluar

Sali Berisha thotë se 490 mijë pensionistë që marrin pension të pjesshëm, bëjnë një jetë në disa aspekte më të vështirë se në socializëm. Gjatë tryezës së organizuar nga Departamenti i Ekonomisë në PD, kreu i demokratëve vuri në dukje që në Shqipëri rritja e rrogave dhe e pensioneve nuk ka ndjekur rritjen e çmimeve.

“Trajtojmë problemin e pensioneve për mbi 1/3 e popullatës së vendit, e cila jeton në varfëri edhe po të jetë për pensionin që merr, në varfëri të skajshme. Mbase duhet të kemi parasysh një gjë, që rreth 490.000 pensionistë marrin pensione të pjesshme. Nuk marrin pensionin minimal të plotë, por marrin pension të pjesshëm. Çka do të thotë, thërrime. Dhe po të kemi parasysh çmimet e tregut, ata kanë një jetë shumë, shumë të vështirë.

Kanë një jetë, në disa aspekte, më të vështirë se në socializëm. Ku, me aq sa merrnin, ato që ishin i blinin. Me ato çmime simbolike. Kurse sot çmimet nuk janë më simbolike. Çmimet janë krejtësisht të përcaktuara nga tregu. Dhe në Shqipëri, fenomeni, zhvillimi më negativ ka qenë ky, që rritja e rrogave dhe e pensioneve nuk ka ndjekur rritjen e çmimeve”, tha ai.