”Berisha n’burg” ndez protestën, qytetarët kundër ndërhyrjes nga të rinjtë e FRPD-së

Sot është dita e 11-të e protestës për të mbrojtur Zvërnecin nga investimet, dhe teksa disa nga qytetarët po mbanin fjalën në podiumin e vendosur para Kryeministrisë, duke thirrur ”Berisha n’burg”, disa të rinj të FRPD-së kanë nisur të zhurmojnë.

Një nga folëset, e cila po mbante fjalën me megafon, u ka bërë thirrje të rinjve të mos ndërhyjnë. Të rinjtë e FRPD-së ishin ata që nisin marshimin të parët nga sheshi ”Skënderbej” drejt bulevardit ”Dëshmorët e Kombit”, duke u shkëputur nga pjesa tjetër e qytetarëve.

Sot Sali Berisha u ka bërë thirrje mbështetësve të tij që të marrin pjesë në protestë, por pa simbolet e PD-së. Dy ditë më parë, nisja e protestës u shoqërua me tensione mes qytetarëve dhe përfaqësuesve të FRPD-së. Qytetarët u kërkuan përfaqësuesve të FRPD-së të largoheshin nga protesta, duke theksuar se nuk duan asnjë përfaqësim politik në tubim. Sakaq, deputeti i Lëvizjes Bashkë, Redi Muçi u akuzua se po prishte protestën.