Berisha në promovimin e librit “Tirania e Buzëqeshjes – Një portret politik dhe psikologjik i Edi Ramës”

Kryetari i Partisë Demokratike, Sali Berisha, mori pjesë sot në promovimin e një libri të autorit Ndriçim Kulla.

Gjatë fjalës së tij, Berisha u ndal tek gjenerata Z dhe protesta e qytetarëve kundër qeverisë. Berisha theksoi ata përbëjnë energjinë, guximin dhe shpirtin e pamposhtur të kësaj lëvizjeje.

“Kjo lëvizje në shumë aspekte është mrekullia më e madhe e Shqipërisë dhe shqiptarëve në kohëra. Pse e them këtë? Aty janë rryma të ndryshme, por ata që janë energjia, ata që janë guximi, ata që janë shpirti i pamposhtur, ata janë të rinjtë e asaj gjenerate që nuk ka njohur kurrë diktaturë autoritare. Dhe është kjo gjeneratë që ngrihet në mënyrën më të fuqishme ndaj një diktature autoritare”, tha Berisha.

Berisha tha se libri i Ndriçim Kullës do të shërbejë si një manual dhe burim frymëzimi për të rinjtë dhe brezat që do të vijnë.

“Kam bindjen se ky libër është gjithashtu një manual i shkëlqyer për ta dhe frymëzim për ta dhe brezat që vijnë. Ndaj kjo trilogji do të mbetet në historinë e letrave një kryevepër e vërtetë”, tha ai.

Berisha vlerësoi gjithashtu kontributin e autorit, duke thënë se “shkrimtari lufton me pendë” dhe se Ndriçim Kulla “e ka bërë pendën e tij një pendë të artë”, duke lënë një trashëgimi të rëndësishme për shqiptarët.

Nriçim Kulla, autori i “Tirania e Buzëqeshjes – Një portret politik dhe psikologjik i Edi Ramës”, nuk është shkruar nga dëshira për të sulmuar një individ. Ai ka lindur nga nevoja për të kuptuar një fenomen. Sepse në histori, më të rëndësishëm se individët janë fenomenet që ata përfaqësojnë.
Pushteti politik nuk është vetëm administrim. Ai është edhe kulturë, psikologji, mënyrë komunikimi, raport me të vërtetën, raport me lirinë dhe raport me qytetarin. Prandaj, kur një njeri qëndron gjatë në pushtet siç po ndodh sot edhe me Edi Ramën, ai pushon së qeni thjesht një kryeministër dhe shndërrohet në një sistem ndikimi që depërton në institucionet, në mediat, në jetën publike dhe madje në mënyrën se si njerëzit mendojnë për realitetin.
Ky libër përpiqet të analizojë pikërisht këtë proces.
Titulli “Tirania e Buzëqeshjes” mund të duket paradoksal. Tirania zakonisht përfytyrohet me fytyrën e ashpër të dhunës, të frikës dhe të represionit. Por koha moderne ka shpikur forma më të sofistikuara të dominimit. Ato nuk vijnë gjithmonë me kërcënim të hapur. Shpesh vijnë të mbështjella me spektakël, me propagandë, me humor, me buzëqeshje dhe me premtime.
Historia na mëson se pushteti nuk bëhet i rrezikshëm vetëm kur përdor forcën. Ai bëhet i rrezikshëm kur arrin të imponojë një realitet artificial, kur arrin të zëvendësojë faktin me gënjeshtrën dhe kur qytetari fillon të dyshojë më shumë tek sytë e tij sesa tek propaganda që i serviret çdo ditë.
Për këtë arsye, libri nuk është vetëm biografi politike e aventurizmit Edi Rama . Ai është edhe një reflektim mbi gjendjen e demokracisë shqiptare, mbi deformimet e saj, mbi shkatërrimin e institucioneve, mbi raportin midis pushtetit dhe së vërtetës, si dhe mbi përgjegjësinë që ka elita intelektuale për të mos heshtur.