Kreu i Partisë Demokratike, Sali Berisha, ka zhvilluar një konferencë për mediat pas rikthimit nga vizita e tij në Shtetet e Bashkuara të Amerikës, ku mori pjesë në Konventën e Partisë Republikane.
Në fjalën e tij, kreu demokrat tregoi detaje nga vizita në SHBA.
“Pas kthimit nga SHBA, ku së bashku me Kryetarin e PR-së morëm pjesë në delegacionin e IDU-së si anëtarë të delegacionit në Konventën Republikane të zgjedhjeve të mesmandatit, së bashku me Sekretarin për Marrëdhëniet Ndërkombëtare, Sekretarin Organizativ, Nënkryetarin e Partisë dhe Kryetaren e LDG-së, morëm pjesë në konventën më të bukur të organizuar në SHBA.
Dhe kur them në SHBA, kjo vetëkuptohet edhe në planetin tonë, pasi askush nuk e ka më të madhe fantazinë dhe magjinë elektorale dhe organizative të konventave sesa dy partitë e mëdha dhe, tani konkretisht, partia në pushtet në SHBA, Partia Republikane.
Sa për hyrje, në mënyrë të çuditshme, ky udhëtim, sado që është 35 vite larg dhe, po të doni, thoni edhe vite drite larg udhëtimit tim të parë, kishte tri ngjashmëri me të.
Së pari, në udhëtimin tim të parë dhe në këtë udhëtim, unë shkova në SHBA si kryetar i opozitës apo i partisë më të madhe opozitare. Kjo është e vërteta.
Së dyti, në atë udhëtim dhe në këtë udhëtim, unë shkova me një qëllim kryesor: të kërkoj mbështetjen e administratës së SHBA-së dhe të diasporës sonë, atëherë për përmbysjen e diktaturës totalitare komuniste, kësaj here të diktaturës autoritare të bazuar në drogën, krimin dhe vjedhjen e shqiptarëve.
Së treti, në atë udhëtim, ku unë, me mikun tim të ndjerë, Gramoz Pashko, shkuam për të marrë pjesë në ceremoninë e rivendosjes së marrëdhënieve diplomatike midis Shqipërisë dhe SHBA-së, thashethemi dhe i tërë establishmenti u tërbuan kundër nesh.
Ata lëshuan ndaj meje dhe Gramoz Pashkos të gjitha epitetet e tradhtisë, agjenturës, etj., etj., por kësaj radhe nuk ishin më të pakta.
kësaj radhe, të themi të vërtetën, për shkak të shumësisë së medieve ishin edhe më të shumta.
Edi Rama u tmerrua.
Atij iu shndërruan sarajet e Surrelit në një bunker terrorizues dhe non-stop lëshonte porosi tek puthadorët e tij, por unë nuk do ndalem në këtë kapitull sepse kjo do të jetë subjekti i një vepre satirike që kanë filluar ta shkruajnë.
Ndaj dhe unë, në detyrim ndaj shqiptarëve, duhet të informoj për takimet që pata, për pjesëmarrjen në konventë, takimet me zyrtarët e lartë, përfaqësues të lartë të Kongresit të SHBA, por edhe të administratës së presidentit Trump, takime me diasporën shqiptare në Nju Jork, në Teksas dhe kudo që shkuam”, tha Berisha.