Berisha: Rama i transportoi paratë me avionin privat jashtë shtetit, të nisin hetimet

Kryetari i Partisë Demokratike, Sali Berisha, i bëri thirrje autoriteteve europiane të nisin hetimet për Kryeministrin Edi Rama pasi e akuzoi se ka nxjerrë para cash jashtë vendit përmes avionit privat.

“I bëj thirrje Prokurorit Publik të BE të ndërmarrë menjëherë hetime për këtë problem tmerrësisht shqetësues. I bëj thirrje Interpolit, Europolit dhe Eurojust të angazhohen në hetimet më serioze të Edi Ramës që sillet si diktatorët e dikurshëm të Afrikës, që mbushin avionët me kartëmonedha dhe i sjellin në banka të ndryshme. Ky hetim ka një vlerë dhe rëndësi të jashtëzakonshme për shqiptarët. PD do të vazhdojë kërkesën e saj për hetimin më të plotë të mundshëm”, tha Berisha në konferencë për mediat.

Berisha i bazoi akuzat në një deklaratë të eurodeputeti Tomas Zdeçovski, i cili denoncoi Ramën si njeriun që përdor familjarët e tij për të transportuar para jashtë shtetit.

Deklarata bombë e europarlamentarit çek është një kontribut madhor pasi PD do rikthejë përsëri kërkesën për krijimin hetimor parlamentar për të hetuar transportin e parave dhe të drogës me avionin privat taksi të Edi Ramës në mbarë Evropën dhe më gjerë”, tha Berisha.