Berisha: Referendumi, vullnet i lirë kundër presioneve politike. IBAR kaloi për arsye gjeopolitike

PD zhvilloi këtë të hënë foltoren e radhës para Kryeministrisë, ku Sali Berisha iu drejtua mbështetësve të tij duke vlerësuar pjesëmarrjen në procesin e brendshëm të referendumit të zhvilluar në parti. Berisha tha se procesi kishte “një vlerë të jashtëzakonshme”, pasi sipas tij, ai shprehu vullnetin e demokratëve dhe besimin ndaj drejtimit të tij. “Referendumi kishte një vlerë të jashtëzakonshme sepse i tha Edi Ramës se fundi yt është i shpejtë”, u shpreh Berisha.

Ai shtoi se pjesëmarrja në këtë proces, sipas tij, ishte shprehje e vullnetit të lirë dhe kundërshtim ndaj presioneve politike. Berisha deklaroi se mbështetësit e tij nuk mashtrohen dhe nuk nënshtrohen, duke i cilësuar si njerëz me ndërgjegje të lartë politike. Gjatë fjalës së tij, Berisha ngriti akuza ndaj kryeministrit Edi Rama dhe mazhorancës, duke i cilësuar si përgjegjës për, siç tha ai, keqqeverisje dhe abuzime.

Nga ana tjetër, Berisha tha se Raporti i IBAR kaloi për shkaqe gjeopolitike. ”Nesër, Edi Rama shkon në Bruksel për konferencën ndërqeveritare për IBAR-in. Ka një faktor gjeopolitik dhe ky rajon do i përkasë BE dhe ky është një vlerësim jashtëzakonisht i drejtë historik dhe me interes shumë të madh për kombet tona. Por me përmbajtjen e tij, Edi Rama është në rreth të kuq”, nënvizoi ai.