Berisha thirrje nga Kuvendi: Të hiqet çdo taksë ndaj naftës për fermerët dhe transportin publik

Kreu i PD-së, Sali Berisha kërkon që të ndërhyhet për të hequr çdo taksë ndaj naftës për fermerët dhe transportin publik. Gjatë fjalës nga seanca plenare në Kuvend, Berisha shtoi edhe se vendet anëtare të BE-së subvencionojnë naftën për fermerët, teksa shtoi se “Gjermania e rriti këtë vit subvencionin dhe mundet edhe vendet e tjera”.

”Të shkosh dhe të deklarosh vetëm pse janë socialistë dhe mund t’u thuash çdo gjë, se Europa nuk subvencionon më naftën, bën një akt cinik, një mashtrim ndaj rreth 40 përqind të shqiptarëve”, tha Berisha.

Kreu i PD-së nënvizon se duhet të rikthejmë me ligj subvencionin e naftës duke hequr ndaj saj çdo taksë jo vetëm për fermerët, por edhe për transportin publik. ”Ju e morët vesh se u pakësuan me 40 përqind linjat e autobusëve, ndaj dhe të bëjmë këtu një ndërhyrje urgjente që të subvencionojmë fermerët”, tha Berisha.