Drejtuesi i Prokurorisë së Posaçme kundër Korrupsionit dhe Krimit të Organizuar (SPAK), Klodian Braho, në raportimin e tij në Komisionin për Çështjet Ligjore dhe Administratën Publike, u ndal te disa prej prioriteteve kryesore të institucionit për vitin 2025, duke theksuar forcimin e hetimeve, përdorimin e teknologjisë së avancuar dhe rritjen e bashkëpunimit ndërinstitucional e ndërkombëtar. Braho vuri në dukje se SPAK ka trajtuar rekomandimet e Kuvendit si pjesë të rëndësishme të konsolidimit institucional, duke i reflektuar ato në përmirësimin e analizës strategjike dhe rritjen e cilësisë së hetimeve.
Një nga pikat kryesore ku u ndal ishte krijimi i një grupi pune për analizën e grupeve të krimit të organizuar, si dhe përgatitja, me mbështetjen e partnerëve ndërkombëtarë, e Vlerësimit Strategjik të Kërcënimit nga Krimi i Organizuar. Ky dokument pritet të analizojë strukturën e grupeve kriminale, mënyrën e veprimit, shtrirjen e tyre dhe lidhjet me pastrimin e parave dhe korrupsionin, duke u bërë publik brenda vitit. Në fokus të raportimit ishte edhe analiza e masave të sigurimit për periudhën 2021–2025, për të vlerësuar standardin e kërkesave të SPAK dhe mënyrën e trajtimit të tyre nga gjykatat, me qëllim përmirësimin e praktikës hetimore.
Në fushën e krimeve zgjedhore, Braho bëri të ditur se janë trajtuar mbi 230 materiale dhe janë regjistruar më shumë se 150 procedime penale gjatë viteve 2021–2025, ndërsa vetëm për zgjedhjet e 11 majit 2025 janë administruar 194 materiale dhe 46 procedime penale. Një tjetër pikë kyçe ishte zhvillimi teknologjik në hetime, ku SPAK po zgjeron përdorimin e analizës së blockchain dhe gjurmimit të kriptovalutave, ndërsa aktualisht ka akses në 22 nga 40 databaza shtetërore. Braho theksoi gjithashtu rëndësinë e unifikimit të metodologjisë hetimore, duke standardizuar procedurat për mbledhjen e provave në përputhje me praktikën kombëtare dhe atë të Gjykatës Evropiane për të Drejtat e Njeriut.
Ai ndaloi edhe te Strategjia për Reduktimin e Çështjeve të Mbartura 2025–2027, e cila synon uljen me mbi 70% të dosjeve të prapambetura, duke përshpejtuar trajtimin e çështjeve të vjetra pa cënuar cilësinë e hetimeve. Në lidhje me Byrosë Kombëtare të Hetimit (BKH), Braho bëri të ditur se po përgatitet rekrutimi i 40 hetuesve të rinj, me fokus në inteligjencën kriminale, hetimet financiare dhe krimin kibernetik.
Sa i përket bashkëpunimit ndërkombëtar, ai raportoi për rritje të ndjeshme të kërkesave për ndihmë juridike dhe zgjerim të skuadrave të përbashkëta hetimore, duke e cilësuar këtë si një element tashmë të përditshëm të hetimeve të SPAK. Braho theksoi se rekomandimet e Kuvendit janë reflektuar në mënyrë konkrete në punën e institucionit dhe kanë ndihmuar në përmirësimin e funksionimit të tij.
/rtsh.al/