Bushati-Aliyev: TAP ofron një shpërndarje më të ekuilibruar të energjisë

Projekti i gazjellësit TAP ofron një shpërndarje më të ekuilibruar të energjisë dhe burimeve të saj në rajon dhe më gjerë.

Kështu u shpreh ministri i Jashtëm Ditmir Bushati gjatë takimit që zhvilloi me ministrin e Industrisë dhe Energjetikës së Republikës së Azerbajxhanit, Natig Aliyev, Zëvendësministrin e Punëve të Jashtme të Republikës së Azerbajxhanit, Khalaf Khalafov dhe Presidentin e kompanisë SOCAR, Rovnag Abdullayev.

Takimi u zhvillua në kuadër të  vizitës së tyre në Tiranë për nënshkrimin e Memorandumit të mirëkuptimit ndërmjet Republikës së Shqipërisë dhe Azerbajxhanit për Masterplanin e gazifikimit të Shqipërisë.

Në takim u përshëndet nënshkrimi i këtij memorandumi, duke e cilësuar këtë akt si fillimin për hapat konkrete dhe substanciale të bashkëpunimit për realizimin e procesit të gazifikimit të Shqipërisë.

Ministri Bushati vlerësoi nivelin e shkëlqyer të marrëdhënieve mes dy vendeve dhe shprehu vullnetin e qeverisë shqiptare për intensifikimin e dialogut politik përmes realizimit të vizitave të nivelit të lartë, si dhe zgjerimin e bashkëpunimit në fushën ekonomike, veçanërisht në sektorin e energjetikës dhe perspektivës që hapet me realizimin e projektit TAP.

Gjithashtu, ministri Bushati falënderoi qeverinë azere për mbështetjen e dhënë për TAP-in, si projekti me fizibël dhe me interes për vendin tonë dhe mbarë rajonin e Ballkanit.

Bashkëbiseduesit ndanë të njëjtin mendim se duhet të intensifikohen kontaktet dhe konsultimet mes dy Ministrive të Jashtme. Gjithashtu, u theksua se bashkëpunimi midis dy ministrive duhet të ketë si pjesë të rëndësishme të agjendës së vazhdueshme aktivitetet në organizatat ndërkombëtare dhe rajonale.