Celibashi: Inteligjenca Artificiale do të aplikohet për herë të parë në zgjedhjet e 9 nëntorit

Kreu i Komisionit Qendror të Zgjedhjeve (KQZ),  Ilirjan Celibashi,  njoftoi se në zgjedhjet e pjesshme të 9 nëntorit do të aplikohet për herë të parë Inteligjenca Artificiale (IA) në procesin zgjedhor në Shqipëri.

Deklarata u bë gjatë konferencës “Mbikëqyrja e Digjitalizimit në Proceset Zgjedhore:  Drejt Konvergjencës midis BE-së dhe Ballkanit Perëndimor”,  ku Celibashi e cilësoi këtë si një projekt testues,  pa ndikim në mënyrën zyrtare të numërimit dhe vlerësimit të votave.

Sipas Celibashit,  përdorimi eksperimental i IA ka nisur për, kërkimin dhe marrjen e informacioneve zgjedhore përmes faqes zyrtare të KQZ-së,  asistencë për administratën zgjedhore dhe subjektet e përfshira në process,  lehtësimin e përpunimit të të dhënave dhe aspekteve të tjera teknike.

Në zgjedhjet e 9 nëntorit,  IA do të përdoret për të ndihmuar në numërimin dhe vlerësimin e fletëve të votimit,  si dhe në nxjerrjen e rezultateve,  por pa zëvendësuar metodën zyrtare të referimit.