Nga Albert Vataj
Gjatë paradites së 1 korrikut, ambientet jashtë Prokurorisë së Posaçme Antikorrupsion (SPAK) u përfshinë nga një imazh sa paqësor, aq edhe me mesazh të fortë politik. Qytetarët dhe aktivistët u mblodhën për të kërkuar nisjen e hetimeve zyrtare bazuar mbi librin “The Albanian Files”, të cilin e konsiderojnë si një provë të pakontestueshme të “kapjes së shtetit”.
Megjithatë, ajo që tërhoqi vëmendjen e të gjithëve ishte vendosja e trëndafilave të kuq në kangjellat rrethuese të institucionit.
Në gjuhën e protestave qytetare, lulet mbartin gjithmonë një mesazh të dyanshëm. Në këtë rast specifik, trëndafilat e kuq te SPAK përfaqësojnë, besim te drejtësia e re. Ky akt u cilësua si një shenjë mbështetjeje dhe inkurajimi për prokurorët e SPAK-ut. Qytetarët treguan se kanë ende shpresë te ky institucion për të shkuar deri në fund të çështjeve të mëdha të korrupsionit.
Por edhe një mesazh paqeje dhe qytetarie. Duke shmangur përplasjet apo gjuhën e dhunshme, protestuesit zgjodhën artin e simbolikës për të treguar se kërkesa e tyre është legjitime dhe paqësore.
Sikurse mund të kuptohet kjo edhe si një paralajmërim. Trëndafili i kuq, përveç mbështetjes, shërben edhe si një “kujtesë” se sytë e opinionit publik janë të drejtuar nga ky institucion dhe pritshmëritë për rezultate janë maksimale.
Përtej simbolikës, protesta kishte edhe një hap konkret institucional. Qytetarët dorëzuan zyrtarisht librin “Albanian Files”, i cili mbante edhe firmat e mbledhura nga qytetarët një ditë më parë në shesh.
Aktivistja Sidorela Vatnikaj konfirmoi se dosja u mor zyrtarisht në dorëzim nga institucioni. Ajo paralajmëroi se ky është vetëm hapi i parë, pasi së shpejti do të depozitohet një kallëzim penal i plotë dhe me fakte konkrete ndaj Kryeministrit Edi Rama, duke i kërkuar këtij të fundit edhe dorëheqjen e menjëhershme.
Tashmë mbetet në dorë të Prokurorisë së Posaçme për të treguar nëse këta trëndafila do të përkthehen në hapa konkretë ligjorë apo do të mbeten thjesht një tjetër kartolinë proteste në kangjellat e drejtësisë shqiptare.