Delegacioni ushtarak italian në Shqipëri, në fokus Porti Ushtarak në Porto Romano

Një delegacion ushtarak italian, i kryesuar nga Gjeneral Major Luigi Casali, zhvilloi një vizitë zyrtare në Shqipëri, në kuadër të bashkëpunimit dypalësh për realizimin e projektit të Portit Ushtarak në Porto Romano.

Delegacioni u prit në Ministrinë e Mbrojtjes nga Zëvendësministrja e Mbrojtjes, Blerina Abrazhda, ku u diskutua mbi ecurinë e bashkëpunimit dhe hapat e mëtejshëm për realizimin e projektit.

Në vijim të vizitës, delegacioni italian zhvilloi një takim pune në Forcën Detare, ndërsa më pas kreu një inspektim në terren në zonën e Porto Romanos, ku parashikohet të ndërtohet kompleksi i ri portual ushtarak.

Projekti i Portit Ushtarak në Porto Romano konsiderohet pjesë e bashkëpunimit mes Shqipërisë dhe Italisë në fushën e mbrojtjes dhe sigurisë, me fokus forcimin e kapaciteteve detare dhe të sigurisë në hapësirën e Adriatikut.

Vizita e delegacionit italian vjen në kuadër të angazhimeve për avancimin e këtij projekti dhe thellimin e bashkëpunimit mes dy vendeve në fushën e mbrojtjes.