Demo: Qeveria do t’u japë përgjigje kërkesave kryesore të protestuesve, por nga flamingo na u shfaq një arkivol

Ministri i Shtetit për Pushtetin Vendor, Ervin Demo, thotë se qeveria është e hapur për të dëgjuar kërkesat e qenësishme të protestuesve. Për mediat, Demo tha se është pjesë e grupit të punës që po shqyrton të gjitha propozimet që konsiderohen të rëndësishme. Ai tha se disa prej tyre kanë qenë tashmë pjesë e prioriteteve të qeverisë, ndërsa të tjera do të merren në konsideratë.

“Vetë protesta në 36 ditë ka pësuar një metamorfozë shumë interesante. Kjo është një protestë që zgjodhi simbolet për të komunikuar dhe disa mesazhe. Pas 36 ditësh ne pamë që nga flamingo na u shfaq një arkivol. Ky është një rrugëtim interesant që vet protesta tenton të japë. Nëpërmjet vdekjes nuk mund të perceptohet as ndryshim as zhvillim, por një gjë është e sigurt që duket qartazi që flamingot kanë shtegtuar nga bulevardi. Dhe flamingot janë shpendë shumë të ndjeshëm për ekosistemin ku duan të ndalen prandaj nuk ndalen kudo”, shpjegoi Demo.

“Detyra jonë si qeveri është të krijojmë kushtet e duhura që flamingot të ndihen si në shtëpinë e tyre kudo. Duke iu referuar kërkesave, unë jam pjesë e grupit të punës, ne jemi duke marrë në shqyrtim të gjitha ato kërkesa që janë të qenësishme. Kanë qenë pjesë e prioriteteve dhe janë pjesë e prioriteteve të qeverisë shqiptare. Janë disa prioritete të reja që ne do t’i marrim në konsideratë. Besoj se kjo është shumë e shëndetshme. Besoj se kjo protestë sjellë një energji me karburant të shtuar për sa i përket reformave në tërësi. Ne do ta kemi të gjithë vëmendjen e duhur që jo thjesht t’i dëgjojmë dhe t’i lexojmë, por edhe të flasim me këdo që është i pritur kundrejt një komunikimi që ofron produkt real sa i përket jetës së qytetarëve”, tha Demo.

Ministri theksoi gjithashtu se protesta është një shprehje normale e demokracisë, por shtoi se ajo humbet legjitimitetin kur shoqërohet me dhunë. “Protesta në vetvete është një shprehi e demokracisë. Besoj se ky është një normalitet në një vend normal ku secili zgjedh të protestojë. Kur merre trajtën e dhunës nuk flasim më për një standard normal. Dhuna ka marrë forma të ndryshme, por edhe gjuha është e rëndësishme”, tha ai. Sipas tij, qeveria mbetet e hapur për të dëgjuar jo vetëm protestuesit, por çdo segment të shoqërisë që kërkon përmirësim të shërbimeve dhe standardeve të jetesës.

“Kërkesat mund të jenë legjitime, por duhet të jemi të kujdesshëm dhe për trajtën që ka marrë protesta. Protesta në vetvete qartazi dita-ditës thahet edhe në konceptin e ideve që ofron. Qeveria shqiptarë ka gjithë vullnetin të dëgjojë, jo thjesht ato që dalin në protestë, por britmat e çdo segmenti të shoqërisë që me të drejtë kërkon ndryshim real sa i përket shërbimeve dhe standardeve të reja që vet shoqëria kërkon. Ne duhet të jemi të gatshëm për t’i dhënë një përgjigje të qartë me politika të qarta dhe të vendosur për të marrë çdo lloj kostoje sa i përket garantimit dhe ruajtjes së stabilitetit jo thjesht ekonomik por mbi të gjitha për të krijuar mundësi të reja zhvillimi të ekonomisë shqiptare”, tha Demo.