Deputetja Luarasi për situatën në qendrën tregtare: Dorëzoj mandatin nëse kam bërë denoncim në Polici

Deputetja e Partisë Socialiste, Iris Luarasi, ka mohuar kategorikisht se ka bërë denoncim në polici ndaj një prej protestueseve që e rrethoi në një qendër tregtare, teksa po shkonte në Kuvend. Ajo tha se lajmi i përhapur në rrjetet sociale nuk është i vërtetë dhe u shpreh e gatshme të japë edhe mandatin e deputetes nëse provohet e kundërta.

“Dje ka populluar rrjetet sociale që unë kam bërë denoncim ndaj njërës prej protestueseve. Nuk është e vërtetë dhe e deklaroj këtë me përgjegjësi publike. Jam gati të jap mandatin tim nëse gjendet një denoncim nga ana ime”, deklaroi Luarasi.

Deputetja sqaroi se kishte deklaruar publikisht se mund të bënte një denoncim për atë që ndodhi, por deri në këtë moment nuk e ka ndërmarrë një hap. “Unë artikulova që do bëj denoncim dhe jam duke e menduar këtë gjë, por nuk e kam bërë ende”, tha ajo.

Luarasi theksoi gjithashtu se nëse policia ka marrë në pyetje protestuesit apo persona të tjerë lidhur me ngjarjen, kjo është pjesë e procedurave të policisë dhe nuk duhet ngatërruar me një denoncim të bërë prej saj.

“Nëse policia e ka pyetur ndërmjet të tjerash edhe për atë që ndodhi dhe që ishte një ngjarje publike, kjo është punë e policisë dhe s’ka lidhje me denoncimin tim”, u shpreh deputetja.

Në lidhje me përplasjen me protestuesit, Luarasi tha se intimidimi dhe bullizimi nuk janë mënyra e duhur për të kërkuar llogari, duke argumentuar se presioni duhet të vijë përmes debatit dhe argumentit.