Ditarët e marrosur

Për vite me radhë, është folur e shkruar shumë për Partinë Demokratike.… Por po të ndjekësh debatet, të tërheq vëmendjen një fakt. Disa data të dhjetorit 1990 ngatërrohen. Ku e kam fjalën? 8 dhjetor (ditë e shtunë) 1990. Protesta e parë e studentëve në Qytetin e Studentëve. 11 dhjetor (ditë e martë), 1990. Ora 20. Takim i studentëve dhe pedagogëve me Ramiz Alinë. Më 12 dhjetor ( e mërkurë) u hartua programi i partisë dhe de fakto është dita e krijimit të Partisë Demokratike. 13 dhjetor ( e enjte) u krijua Komisioni i Parë Nismëtar i PD-së dhe u morën 300 firma për legalizimin e PD-së. Më 19 dhjetor ministria e Drejtësisë legalizoi krijimin e PD-së. Më 22 dhjetor (1990) në Qytetin Studenti, u bë mitingu i legalizimit të PD-së.

Nga data 8 dhjetor 1990 deri më 5 janar 1991 kur doli gazeta “Rilindja Demokratike”, ka shume ngjare, skena e mizaskena, biseda e takime. Për fat të keq deri më 5 janar 1991 kur u botua gazeta “RD”, ka pak dokumente, pak informacion i shkruar për të hedhur dritë mbi këto 30 ditë.

Për të qenë më i saktë. Në fakt ka disa filmime. Unë mendoj se filmimet më të mira dhe më të sakta i ka Agim Buxheli. Me kamer amatore në dorë, ai kishte të drejtë të merrte pjesë në mbledhjet e Komisionit Nismëtar. Ai ka ndjekur shumë takime. Shumë biseda. Mitingje. Por këto filmime, nuk janë pjesë e arkivit të PD-së. Nga ana tjetër, në ato ditë dhjetori 1990, Komisioni Nismëtar bënte mbledhje çdo natë. Çdo debat është shënuar në protokoll. Me këto protokolle janë mbushur 10-15 fletore. Shumica e fletorëve, nuk gjenden në arkivin e PD-së.

Vendin e dokumenteve, e ka zënë fantazia e analistëve a politikanëve. Në debat ka marrë pjesë edhe Edi Rama. Ai flet për refleksionet e vitit 1990 në sallën e Akademisë së Arteve. Kujtime të bukura. Nostalgji. Muzika e Bitëllsave. Ironi therëse me pushtetin e Partisë së Punës. Guxim për kohën. Por refleksionet, me gjithë bukurinë dhe kurajën, nuk janë pjesë e PD-së. Edhe Rama e di këtë fakt. Shumë lexues, nuk e dinë se Edi Rama, 23 vjet më parë, në zanafillën e themelimit të PD-së, ka bërë përpjekje, për të qenë lider i kësaj partie…

Si rrodhën ngjarjet? Edi Rama, më 8 dhjetor 1990 ishte në Greqi. Në Tiranë mbërriti më 13 dhjetor. Kur arriti në Qytetin e Studentëve, ishte bërë zgjedhja e Komisionit Nismëtar të PD-së. I vonuar, u fut në mbledhjen e parë të Komisionit Nismëtar. Gjëja e parë që bëri: Sherri me Berishën. Pas ndërhyrjes me takt të Pashkos, Edi Rama u largua nga mbledhja. Rama bëri edhe përpjekje të tjera për t’u futur në drejtimin e PD-së. Kur dështoi, vendosi ta sfidojë PD-në, duke krijuar Partinë Popullore Fetare në bashkëpunim me Spartak Ngjelën, Ardrian Klosin, Kasëm Trebeshinën etj… Në vjeshtën e vitit 1991, në parlament u diskutua projektligji që ndalonte krijimin e partive me baza fetare. Projektligji u miratua.