Deputeti i partisë “Mundësia”, Erald Kapri thotë se Reforma Territoriale nuk synon përmirësimin, por konsolidimin e pushtetit politik të mazhorancës. Sipas tij, modeli që po propozohet bie ndesh me praktikat evropiane, ku funksionojnë njësi më të vogla të pushtetit vendor. “Rama kërkon të cimentojë pushtetin e tij politik. Në Evropë ka njësi të vogla të pushtetit vendor. Sot bashkitë janë me punonjës militantë. Nuk do të heqin njerëzit e tyre nga puna me reformën e re duke shkrirë bashki, por duke rritur territorin e një bashkie do të jetë më e vështirë të menaxhohet”,-tha në ”News 24”.
Deputeti solli në vëmendje edhe situatën në Tiranë, duke argumentuar se qeverisja vendore ka dështuar dhe se vendimmarrja duhet t’u rikthehet komuniteteve lokale. “Duhet të nisen nga parimi që komuniteti vendos. Nëse Libohova do një bashki të vogël për t’u qeverisur, duhet ta ketë këtë të drejtë, e jo të vendosë qeveria gjithçka. Rama do të kërkojë që PS të fitojë 90% të pushtetit lokal me reformën e re në letër”.
Duke folur për situatën politike, Kapri u shpreh se kryeministri Edi Rama ka humbur aftësinë për të qeverisur normalisht gjatë mandatit të katërt. Ai lidhi këtë me skandalet e fundit dhe me protestat kundër qeverisë, të cilat, sipas tij, kanë marrë përmasa të paprecedenta. Kapri deklaroi gjithashtu se protesta gëzon mbështetje të gjerë në opinionin publik, duke iu referuar sondazheve që, sipas tij, tregojnë se shumica e qytetarëve i konsiderojnë të drejta kërkesat e protestuesve. Në këtë kontekst, ai përsëriti se largimi i kryeministrit mbetet kërkesa kryesore.
“Dorëheqja e Ramës është kusht i panegociueshëm. Rama priste që vapa apo sulmet e tij ndaj protestës do e ndalonin, por jo, nuk ia doli dot. Rama po punon që të ketë një garanci që të mos preket nga drejtësia. Besojmë se SPAK do të trokasë në derën e Edi Ramës për të kërkuar arrestimin ose pezullimin e tij. Rama nuk e anashkalon dot drejtësinë, emri i tij është në çdo dosje korruptive”.