Erion Braçe poston video nga ”Rruga e Salës” për hapësirat publike

Deputeti i PS-së, Erion Braçe ka publikuar një video nga rruga “Mustafa Matohiti”, e njohur ndryshe edhe si ”Rruga e Salës”, për shkak të banesës që ka aty kryetari i PD Sali Berisha.

Braçe thotë se edhe lokalet që janë përgjatë asaj rrugice, do të duhet që të heqin tendat që kanë zaptuar hapësirat publike. Deputeti socialist ka publikuar mesazhin që i ka dërguar një qytetar, ku ankohet përse në atë zonë nuk janë liruar hapësirat publike të lokaleve.

Deputeti Braçe ka publikuar edhe përgjigjen e tij për qytetarin në fjalë. “O deputet po këtu ke rruga Mustafa Matohiti, rrugica e Salës, pse nuk e lironi hapësirën publike? Vetëm për ne në komune fole me na i prish ti. Na shife vetë s’është prek asigjo e asnjoni”. Ilir, rrofsh për videon. Bëj durim, do çlirohet çdo centimetër, kështu na kanë thënë”, ka shkruar Erion Braçe në Facebook. Lirimi i hapësirave publike është një aksion që Kryeministri Edi Rama ka nisur në të gjithë vendin që prej muajit korrik.